台語百科 Wiki
注册
Advertisement

Îu-thài-kàu hîng-sîng tī kong-guân-tsîng nn̄g-tshing nî ê Tiong-tang tē-khu, kiàn-li̍p Iu-thài-kàu ê bîn-tso̍k sī hit-tong-sî ê îu-bo̍k bîn-tso̍k Hi-pik-lâi-lâng.

Iu-thài-kàu mā-sī it-sîn-lūn ê tsong-kàu, tsông-pài tsú sîn A-tòo-nái (阿竇乃). Iu-thài-kàu sī Hi-pik-lâi-lâng luē-pōo ê bîn-tso̍k tsong-kàu. Ki-tok-kàu kah I-su-lân-kàu (Islam) tsit-nn̄g-ê sè-kài siōng tuā ê tsong-kàu, lóng-sī uì Iu-thài-kàu thuànn--tshut-khì--ê. Kóo-tsá-sî, Hi-lia̍p kok-ông A-li̍k-san-tāi tāi-tē phài-ping tsing-ho̍k Hi-pik-lâi-lâng kiàn-li̍p ê Iu-thài-kok, tō-tì tsiânn tsuē Hi-pik-lâi-lâng lîu-lōng kàu Hi-lia̍p tè-kok, sì-suànn-gōo-lōo. Kong-guân-tsîng sann sè-kí, Hi-lia̍p kok-ông A-li̍k-san-tāi Tô-lia̍t-bi̍t jī-sè (亞歷山大陀勒密) tsiau-tsi̍p tshit-tsa̍p-guā-ê ē bat Hi-lia̍p-gú ê Iu-thài-lâng, bīng-līng in tsíng-lí Iu-thài bûn-hiàn pīng-tshiánn huan-i̍k tsò Hi-lia̍p-gú, tse to̍h-sī hiàn-tsú-sî Kit-tok-kàu teh iōng--ê Hi-lia̍p-gú sìng-king tang-tiong ê Kū-iok-tsuân-su hit pōo-hūn, lâng kiò-tsò tshit-tsa̍p tsú i̍k-pún. Lōo-bué, Iu-thài-kok īu-koh sīu-tio̍h Lô-má Tè-kok thiat-té bia̍t-bông, iah..tī-leh Iâ-lōo-sat-líng (Jerusalem/耶路撒冷) ê Iu-thài-kàu tiān-tn̂g mā pī huí-tiāu, kan-ta tshun tsi̍t-tsat (聖殿) nuā-kôo-kôo ê tshîunn-á (khàu-tshîunn). Iu-thài-lâng mā suah hun-suànn kàu Au-A kok sóo-tsāi.

Kong-guân la̍k sè-kí ê sî, ū-ê Iu-thài ha̍k-tsiá kā "tshit-tsa̍p tsú sìng-king" the̍h tshut-lâi koh tsíng-lí kàu-tuì, thâi-thiāu 1-kuá-á kah Hi-pik-lâi guân-bûn a̍h-sī A-la-pik bûn-pún bô kuan ê luē-iông, pīng-tshiánn kā king-kuè tiông-sin tsíng-lí ê hit-pōo-hūn bûn-jī koh kā huan-i̍k tsò Hi-pik-lâi-bûn, tsiânn-tsuè Iu-thài-kàu ê sìng-king. M̄-koh, tsit-ê kóng-huat tsí-put-kò sī Hi-pik-lâi-gú sìng-king hîng-sîng ê tsi̍t-tsióng kóng-huat niâ.

Nn̄g-tshing-guā nî lâi, Iû-thài-lâng lóng hun-suànn tī sè-kài kok-tē, kok-lâng ê gí-giân kah bûn-huà tsin tsá to̍h hun-huà, in lóng-sī khò thóng-it (kiōng-tông) ê tsóng-kàu sìn-gióng teh uî-tshî bîn-tso̍k jīn-tông. Iu-thài-kàu jīn-uî kìu-sè-tsú kàu-tann iá-buē kàng-sing (tshut-sì), in bô sîng-jīn ki-tok Iâ-soo sī kìu-sè-tsú (tse to̍h-sī Iu-thài-kàu hām Ki-tok-kàu siōng-kài kin-pún ê khu-pia̍t), in-uī án-ne, Iû-thài-kàu mā ti̍t-ti̍t sīu-tio̍h Ki-tok-kàu-tôo ê kheh-tse̍h kah khuànn-khin. Iû-thài-kàu-tôo thàu-té lóng him-bōo kah tsông-siong pún bîn-tso̍k tshia-iānn ê kuè-khì. Tsa̍p-kàu sè-kí liáu-āu, Iu-thài hok kok su-sióng tī tsuân-kîu hing-khí, kok sóo-tsāi ê Iu-thài-lâng tàu-té tó-tńg-khí Pa-lia̍t-su-thán bué-siu thóo-tē kah tshân-hn̂g, liáu-āu in kiàn-li̍p Í-sik-lia̍t tsit-ê kok-ka. Mā in-uī án-ne, suah lâi hām A-la-pik-lâng (lâng kóng A-la-pik-lâng í-king tiàm tsit-tè thóo-tē khiā beh 2000 nî loh) huat-sing giâm-tiōng ê tshiong-tu̍t.

In-uī ū-ê Iû-thài-kàu, Ki-tok-kàu kah I-su-lân-kàu tsit-sann-ê kàu-phái lóng ū sîng-jīn Kū-iok Sìng-king tang-tiong ê A-pik-la-hán (亞伯拉罕; Abraham), sóo-í ū-ê tsong-kàu ha̍k-tsiá tsuânn kā Iu-thài-kàu, Ki-tok-kàu kah I-su-lân-kàu thóng-thóng kiò-tsuè A-pik-la-hán-kàu .


Advertisement