格里曆法（Keh-lí li̍k-huat; Gregorian calendar）是現此時通世界上普遍的曆法，這个曆法是教宗格雷戈里十三世(Gregorius XIII)佇1582年2月24公布的，主要是共1582年10月初4的隔轉工定做1582年10月15；使用AD做紀元，閏年嘛有新的規約。
原底的尤流斯(Julius)曆法是4年一閏，平素時一年365工，閏年加一工，一年扯勻有365.25工，總是日頭年平均是365.242190419工，久來精差愈來愈大，格里曆法四年一閏，毋過若是會當予100整除的年無閏，會當予400整除的年閣有閏，一年扯勻有365.2425工，加真精確。
352年頭一改的基督教大會規定春分是佇3月21彼工，尤流斯曆佮日頭年的精差經過千外年的累積，致使1582年正實的春分已經走去3月31囉，所以佇1582年愛減算10工，予1583年的春分會當轉來去3月21。
教宗的號令干焦佇天主教的國家有效，新教的國家親像英國一直到18世紀才改用格里曆，露西亞信東正教，一直到20世紀才換過來。
格里曆是一種日頭曆，素常講的公曆、新曆、西曆、陽曆攏是指格里曆法。
- 這篇文章是對河佬百科(Holopedia)的："Gregorius Le̍k-hoat"改來的，原本文章的作者請看伊的編輯歷史。