武器（bú-khì）是拍人抑拍動物予伊受傷甚至死亡的物件。人佇古早就開始用武器，這馬猶留的古早武器是石頭做的，古早的人嘛有用矛佮弓箭。
人會曉用鐵仔做物件了後，誠濟人就改用劍做武器，嘛有人做機器來擲大石頭，攻破敵人城市的牆圍。
後來火藥佇中國予人發明，歐洲共提來做銃佮大砲，彼个武器比以早的較好，予歐洲人會當征服世界誠濟所在。銃嘛予人提來拍獵，甚至有用手銃彈別人。
人一直咧發明新武器，西元1800年代的時陣發明機關銃，彼彈銃子的速度誠緊。到發明飛行機了，人開始佇飛行機頂彈敵人佮抌炸彈 ，嘛做戰車面頂裝一支大砲，車身用較勇的鐵仔做。彼時陣嘛開始用地雷，地雷是一種埋佇塗裡的炸彈，人若踏著，地雷就爆炸。佇第一次世界大戰開始用毒氣。
佇第二次世界大戰，德國開始用飛彈炸英國，佇第二次世界大戰結束進前，美國用原子彈炸日本廣島佮長崎兩个城市。
第二次世界大戰了後，人類繼續發明新武器。這馬人類已經關心大毀滅武器的使用，彼會誠緊就刣死誠濟人，而且製造的成本誠低，使用嘛誠簡單。
一種大毀滅武器就是毒氣，新型的毒氣（親像神經毒氣）就比以早的更加毒，另外一種大毀滅武器是病毒，彼會予誠濟人破病甚至死亡，誠濟國家嘛埋誠濟地雷，逐年攏造成誠濟人死傷。
舊型的武器佇戰爭相拍當中，照原刣死誠濟人，1990年代到21世紀，佇非洲的戰爭當中，誠濟人是予大刀刜死。
人有時陣會想講欲用法律、條約佮國際協定來控制武器，煩惱武器造成的死傷。
逐國的法律無啥仝，親像佇美國的憲法就允准怹國的人「有權利匟武器佮紮武器」，有的國家嘛可能講佇怹國袂使囥武器抑是用武器，抑是愛政府允准才會使囥武器。國家佮國家嘛會協定袂使用啥物武器對付別國，抑是袂使有誠濟飛彈。